La Xunta quiere aprovechar que España presidirá Europa desde enero, para pasarle la boina a ZP

Pontevedra-Vigo (MORRAZO-TRIBUNA) .- O director xeral de relacións Exteriores e coa Unión Europea, Jesús Gamallo, defendeu esta mañá os obxectivos “ambiciosos, responsables e realistas” da Xunta de Galicia de cara a presidencia española da Unión Europea no primeiro semestre de 2010.  Así o fixo na Comisión Permanente non Lexislativa para Asuntos Europeos do Parlamento galego, na cal aproveitou para destacar a boa acollida do Goberno ás propostas galegas entregadas polo presidente da Xunta ao Secretario de Estado para a UE, Diego López Garrido, o pasado 26 de agosto.

F-009 inaugura en Bruselas exposición que es todo un reclamo cara a Galicia

BRUSELAS (MORRAZO-TRIBUNA).-“O Ano Santo é a mellor carta de presentación posible para darlle a Galicia a dimensión internacional que merece, porque o fenómeno Xacobeo é un ben que ten en Santiago e en Galicia o seu epicentro, pero que é patrimonio de toda Europa”. Son as palabras do titular da Xunta, Alberto Núñez Feijóo, que xunto co presidente do Parlamento Europeo, Jerzy Buzek, e o conselleiro de Cultura e Turismo, Roberto Varela, inauguraron esta tarde en Bruxelas a exposición fotográfica Olladas no Camiño de Santiago. Xacobeo 2010, unha mostra do patrimonio arquitectónico e da paisaxe natural e humana das rutas xacobeas.

“Galicia e o Xacobeo son, sen dúbida, unha realidade conxunta e queremos que o próximo ano esa realidade se mostre viva”, sinalou o mandatario autonómico incidindo en que o obxectivo principal da Xunta é que o Ano Santo sexa un espazo “de encontro espiritual, cultural e turístico” porque sen dúbida isto “favorecerá notablemente a expansión e difusión da imaxe de Galicia como terra de acollida e meta do turismo cultural”.

Consensuar o futuro, transformar ideas en feitos e camiñar con honradez
Feijóo relatou, ademais, que a nosa rexión se define e funda contemporaneamente “sobre os cimentos do galeguismo cordial” e que precisamente “consensuar o futuro respectando as identidades que necesariamente un país coma o noso aglutina, transformar as ideas en feitos e camiñar con honradez cara ao futuro”, é o horizonte “de cara á celebración do próximo Ano Santo”.

Na mesma liña, o mandatario galego destacou que a Xunta traballa para introducir elementos que garantan a sustentabilidade do Camiño e eviten a súa degradación patrimonial e ambiental. “Debemos lograr o equilibrio entre os valores de modernidade e confort turístico e o respecto pola esencia da peregrinación como fenómeno relixioso e espiritual en vigor para millóns de persoas en todo o mundo”, apuntou incidindo en que é necesario traballar nesta senda “se queremos que as fermosas e emotivas fotografías que hoxe vemos como parte do próximo Ano Santo Xacobeo sexan o legado de mañá para os nosos fillos”.

Unha historia “aberta a Europa”
Na súa intervención, Alberto Núñez Feijóo lembrou o vínculo existente entre a ruta xacobea, Galicia e a conformación de Europa: “o Camiño de Santiago foi, é e será un compacto piar da construción europea”, aseverou. Subliñou, ademais, que todos os pobos atesouran unha historia que os define e sitúa, e que a de Galicia é a dunha historia “aberta a Europa”.

Destacou, ademais, que a pesar de que os mapas sitúan a comunidade galega “no extremo de Europa”, a historia, a vocación e a cultura a sitúan “no corazón do continente”. Feijóo fixo a mesma comparación con Polonia –país do que procede o presidente do Parlamento Europeo- que, dixo, “tamén sufriu unha inxustiza cando por pereza ou ignorancia era situado na Europa do Este”. “Polonia sempre estivo no centro de Europa, por enriba de avatares sempre pasaxeiros. A súa Galitzia e a nosa Galicia non deixaron de estar presentes nas grandes encrucilladas que nos teñen traído ata aquí”, sinalou dirixíndose a Jerzy Buzek.

O presidente galego abondou en que os dous territorios, Polonia e Galicia, tamén fixeron unha achega “similar” porque Europa “é un conxunto de valores, crenzas e devocións que permiten que haxa entre nós unha comunicación profunda, espiritual, que as linguas non poden entorpecer”. “Este conxunto de valores herdados dos nosos antepasados e cultivados con tolerancia están nos cimentos do proxecto europeo; por iso, Europa como proxecto político estivo incompleto ata que Polonia, España, Galitzia e Galicia non se reicorporaron á gran corrente europeísta”, argumentou.

“O centro de Europa está aquí, en Bruxelas, pero tamén no último pobo polaco ou galego. He aí a grandeza desta Unión que estamos configurando”, insistiu Feijóo remarcando que ningunha distancia xeográfica, nin ningún muro “impediron que a peregrinaxe europea acabase en xubileo”.

Olladas no Camiño de Santiago
A mostra fotográfica inaugurada hoxe remítenos, como indicou Feijóo, “en primeiro e en último termo á ruta xacobea: un fenómeno histórico denso e intenso; unha realidade patrimonial sumamente complexa e rica; un evento que revitalizou e aínda hoxe revitaliza os territorios que atravesa; e un camiño simbólico asociado ás orixes remotas do apostolado cristián e á configuración europea”.

Olladas no Camiño de Santiago. Xacobeo 2010 recolle as imaxes de catorce fotógrafos de toda Europa, que realizan unha proposta estética “singular” na que amosan como entenden e perciben cada un deles o Camiño, conformando, no seu conxunto, “un relato plural sobre a experiencia humana, espiritual e relixiosa da peregrinación a Santiago de Compostela”, en palabras do presidente galego.

“Na exposición a paisaxe natural, o patrimonio arquitectónico e sobre todo a paisaxe humana son capturados polas cámaras lúdicas dos fotógrafos”, indicou Feijóo subliñando que dentro da heteroxeneidade que propón a mostra, as instantáneas logran representar “partes esenciais do Camiño entendido como espazo único para a aprendizaxe vital”.

O presidente da Xunta non quixo rematar a súa intervención sen convidar a todos os europeos “a defender, a promover e, sobre todo –dixo- a vivir o Ano Santo”.

Encontro Presidente Parlamento Europeo
Feijóo reuniuse, antes da inauguración, co Presidente do Parlamento Europeo e entregoulle un informe de temas relacionados con Galicia e da preocupación da situación dos barcos no Indico. Por outra banda, Jerzy Buzek confirmou a súa presencia en Galicia no Xacobeo

Galicia será a sede da primeira Xornada Europea de Rexións Marítimas, que abordará temas de economía marítima

Pontevedra-Vigo (MORRAZO-TRIBUNA).- O titular da Xunta, Alberto Núñez Feijóo, e o presidente do Comité das Rexións e representantes da rexión belga de Flandes, Luc Van den Brande, acordaron que Galicia será a sede da primeira Xornada Europea de Rexións Marítimas, que abordará temas de economía marítima e o futuro da Política Común de Pesca. Segundo manifestaron ambos mandatarios no encontro que mantiveron esta mañá en Bruxelas, a iniciativa pretende servir de foro para que todas as rexións europeas afectadas por problemas relacionados co sector marítimo e pesqueiro e pola reforma da Política Común de Pesca debatan sobre o futuro do sector.

Segundo lle trasladou o mandatario autonómico ao presidente do Comité das Rexións, a posición de Galicia pasa por facer extensiva esta participación ao sector conserveiro e da acuicultura, dada a importancia que estes teñen na economía da comunidade.

O encontro, que previsiblemente se celebrará nos primeiros meses do vindeiro ano, estaría organizado polo Comité das Rexións e apoiado pola propia Comisión Europea. Durante a súa celebración, as rexións europeas con intereses pesqueiros debaterían co fin de tentar achegar posturas e establecer puntos de acordo para a reforma da Política Común de Pesca. Estes acordos de cara á nova lexislación pesqueira que está en marcha, serían trasladados polo Comité das Rexións á Comisión Europea, ao Parlamento e ao Consello de Europa.

Oportunidade para Galicia
O presidente da Xunta considerou a celebración desta xornada unha grande oportunidade para Galicia, posto que poderá facer escoitar a súa voz en asuntos prioritarios e que nos preocupan, como a baixada de aranceis de Papúa-Guinea ou as axudas do Fondo europeo da pesca.

Núñez Feijóo salientou que a presenza dos diferentes clústers e dos conserveiros na xornada permitiría que estes puidesen expoñer a súa posición de cara a situacións de dumping ou á baixada de aranceis de Papúa-Guinea co fin de evitar que outros países como China e Tailandia o poidan aproveitar para acceder á UE.

O mandatario autonómico lembrou que onte, o presidente da Comisión Europea asumiu o compromiso de que a UE estará atenta para que non se produzan este tipo de distorsións e comprometeuse a estudar a posibilidade de que Papúa-Nueva Guinea poña a disposición dos barcos españois e galegos novos caladoiros.

Feijóo apostou, ademais, por que a Xornada Europea de Rexións Marítimas poida acoller aos representantes do sector da acuicultura co fin de debater o acceso destas empresas ao Fondo Europeo da Pesca. O mandatario galego lembrou que este fondo non permite que accedan ás axudas as empresas que facturen máis de 250.000 euros ao ano ou que teñan máis de 750 traballadores. Por iso avogou por reformar este regulamento porque, dixo, “en Galicia as empresas teñen unha certa dimensión e tiran do sector, polo tanto, poden xerar moitos postos de traballo con empresas menores”.

Epístola de Feijóo en Bruselas sobre cómo defender el sector del automóvil

BRUSELAS (MORRAZO-TRIBUNA).- O titular da Xunta, Alberto Núñez Feijóo, avogou hoxe por mellorar a eficiencia e a eficacia do sector do automóbil europeo e por manter a necesaria simbiose entre o mercado e os estados co fin de gañar en competitividade, un asunto no que comprometeu a máxima implicación e participación da comunidade galega. “Galicia quere estar na primeira liña da batalla pola defensa do sector do automóbil en Europa e, en consecuencia, o Intergrupo da Crise do automóbil no que me honro participar, ha de ser un catalizador desta mensaxe que, alta e clara, ha de chegar aos Estados membros e ás institucións da Unión, para que a nosa industria teña ao menos un futuro tan glorioso como brillante ten sido o seu pasado”.

Na súa intervención no marco da xuntanza do Grupo Interrexional que abordou os problemas actuais do sector automobilístico europeo -presidido por Jean-Yves LeDrian, e do que Feijóo é vicepresidente-, o titular da Xunta aludiu á aposta pola formación e a innovación do grupo automobilístico chino Geely -que triplicou o seu cadro de enxeñeiros e promoveu a creación da súa propia universidade tecnolóxica para conquistar o mercado automobilístico de baixo custo nos países en vía de desenvolvemento-, para insistir na necesidade dunha reflexión profunda sobre o sector automobilístico europeo.

“Os gobernos e as empresas deberán ir máis alá nas súas reformas e nas súas estratexias. Deberán reconsiderarse as políticas de innovación, deslocalización, especialización en partes con alto contido tecnolóxico”, sinalou o mandatario galego incidindo en que debemos asumir que o tempo europeo para a toma de decisións non é o mesmo que o dos nosos competidores globais. “A globalización mantén unha cadencia que non se compadece cos tediosos procedementos administrativos. Por conseguinte –explicou-, debemos mellorar canto antes a nosa eficiencia e eficacia para así adaptar as nosas políticas públicas no sector industrial e de servizos”. Neste contexto destacou a necesidade de compartir as mellores prácticas, intercambiar experiencias e traballar en rede como as estratexias “que debemos implementar en maior medida e con maior intensidade, abríndonos cara novos enfoques”.

Avaliación e revisión periódica do sector
“Desde a política de ordenación territorial ata a formación e capacitación profesionais, todo o relacionado coa competividade da industria do automóbil debe estar sometido a periódica avaliación e revisión”, argumentou Feijóo. Neste sentido, indicou que non se lles pode pedir aos traballadores e aos equipos directivos da industria que manteñan unha permanente actitude proactiva e de adaptación se a administración, pola súa banda, non é capaz de facer un esforzo. “Debemos mellorar os procesos co horizonte posto na máxima eficacia”, enfatizou lembrando que "sen esta simbiose entre o mercado e o Estado, a probabilidade de que as empresas europeas do sector do automóbil gañen a batalla se reducirá notablemente”.

“Por desgraza, os posteriores lamentos non servirán para recuperar o perdido”, asegurou, aludindo a que a experiencia noutros sectores como o caso da siderurxia ou a construción naval así o demostran. Feijóo referiuse ao axuste realizado pola Comunidade Económica Europea nos anos 80 e 90 da capacidade de produción dos seus estaleiros, da cal, lembrou, “Galicia foi unha das rexións europeas máis damnificadas”, e ao significativo repunte da demanda mundial de buques e instalacións navais que se ten producido no último decenio. Pero para entón, destacou, “Europa non só se desprendera das infraestruturas produtivas, senón tamén dos seus traballadores cualificados e dos equipos técnicos. O resultado foi claro: Europa quedou postergada no reparto dos beneficios desa nova demanda, a pesar de que moitos dos encargos procedían de firmas europeas”, subliñou.

O presidente galego incidiu na necesidade de que isto non se volva repetir no sector automobilístico europeo. “Non podemos rendernos preventivamente. Non debemos aceptar que o sector do automóbil é xa demasiado maduro e que, polo tanto, cabe sacrificalo sen máis ante os desafíos actuais”, aseverou.

A experiencia galega
No marco da xuntanza desta tarde, o titular da Xunta argumentou que a actual crise da industria do motor ten unha clara orixe financeira; pero “non nos enganemos”, advertiu, salientado que baixo a superficie tamén existen ameazas de carácter estrutural que se deben afrontar con medidas tamén estruturais. “Esta é unha crise esencialmente de oferta e aí é onde debemos poñer o noso esforzo”, matizou, afirmando que as dificultades se deben converter “en oportunidades” e en que Europa “ten que reaccionar ante o novo escenario internacional”.

Feijóo puxo como exemplo de adaptación ao cambio á industria automobilística galega, que vén realizando “un extraordinario esforzo” neste sentido, obtendo melloras “marxinais” en termos de calidade e eficiencia. Destacou a posta en marcha do Clúster do Automóbil, ”moi competitivo no contorno de Vigo, a nosa cidade de referencia para o sector, onde tamén se sitúan as enxeñerías que teñen maior relación con esta industria”, concretou.

Incremento de matriculacións
Pero, pese a todo, “as medidas adoptadas non son suficientes para poder competir nun contorno que evoluciona a gran velocidade”, matizou, remarcando que por iso o Goberno galego, en sintonía cos axentes do sector, se esforza permanentemente por mellorar os nosos indicadores. “Non aceptamos unha actitude pasiva nin consideramos inevitable e sobrevida a competencia foránea”, subliñou, lembrando que, dado o extraordinario da actual situación económica o Executivo autonómico adoptou nos últimos meses decisións que deron resultados satisfactorios, como o plan de axudas autonómicas directas para fomentar a compra de vehículos, que se fixeron extensivas para os autónomos –a diferenza das axudas estatais- ao incluír tamén os vehículos industriais. Os froitos destas políticas son visibles, explicou o xefe do Executivo autonómico resaltando que Galicia, xunto con Navarra, lideran o incremento de matriculacións no último ano (un incremento do 20% respecto ao ano anterior no caso galego) e que a Citröen será o único dos grandes fabricantes que pecharán o ano sen activar un expediente de regulación de emprego.

Feijóo aprovecha su visita a DURAO BARROSO para pasarle la boina como quien no quiere la cosa...

Pontevedra-Vigo (MORRAZO-TRIBUNA).-O titular da Xunta, Alberto Núñez Feijóo, defendeu hoxe ante o presidente da Comisión Europea, Durao Barroso, os intereses de Galicia nos sectores lácteo e pesqueiro, ademais do levantamento ao veto da construción civil naval na ría de Ferrol. No encontro celebrado este tarde en Bruxelas Alberto Núñez Feijóo lle propuxo a Barroso un sistema de “aterraxe suave” no reparto dos fondos europeos, unha proposta na que Galicia traballa xunto con outras 15 rexións europeas. A reunión serviu, ademais, para que o titular da Xunta invitase ao presidente da CE a visitar Galicia con motivo do Xacobeo 2010, proposta de Barroso aceptou.

“Teño a esperanza de que haxa posibilidade de éxito nos grandes temas”, salientou o presidente galego á saída da xuntanza. Así, Feijóo explicou que lle trasladou ao presidente da Comisión unha proposta para o novo escenario que se abrirá cos orzamentos da UE a partir de 2013; un plantexamento que ten co obxectivo que se produza un “aterraxe suave” nas rexións que deixarán de ser obxectivo número 1 dos fondos de cohesión.

“Estamos traballando 16 rexións do conxunto da UE, entre elas o norte de Portugal, para plantexar formalmente que Galicia e as outras rexións non perdan de forma abrupta os fondos que están percibindo nos presupostos 2009-2010”, salientou o presidente galego, quen valorou a resposta de Barroso. “Voume contento de que o presidente da Comisión se mostrara como un firme defensor dos fondos de cohesión; porque, aínda que sexa unha decisión dos estados membros, que o presidente da Comisión vexa con bos ollos que as rexións que eran obxectivo 1 non perdan de forma abrupta os fondos é unha moi boa noticia”, afirmou. Feijóo sinalou, ademais, que Durao Barroso felicitou á delegación galega por anticiparse á elaboración dos presupostos.

Así, o presidente galego salientou que “non é lóxico” que zonas que percibiron estes fondos durante máis de 20 anos os perdan de forma repentina, e pediu o apoio do Goberno de España. “Eu espero que o Goberno de España apoie a Galicia e a outras rexións como Andalucía ou Estremadura; polo ben de España e dos recursos públicos destas autonomías”, engadiu.

Unha mesa de traballo permanente para o sector lácteo
O presidente da Xunta tratou con Durao Barroso o difícil momento polo que atravesa o sector lácteo da Comunidade, con prezos que non cobren os custos de produción. “Coñece o tema e plantexou a posta en marcha dunha mesa de traballo, de reflexión, case permanente dos ministros dos estados membros”, salientou Feijóo.

No tocante á construción civil naval, Barroso trasladoulle ao xefe do Executivo autonómico que se trata dunha cuestión que a presidencia de España da UE debe plantexar de forma oficial, polo que o primeiro semestre de 2010 será clave. “Adelantounos que era fundamental a presenza de España, a acción diplomática española durante a Presidencia europea e que, como presidente da Comisión, está disposto a estudar calquera plantexamento que se poña enriba da mesa para buscar unha solución a esta cuestión”, afirmou.

Compromiso co sector da conserva tras a baixada dos aranceis
O presidente galego tratou con Durao Barroso o próxima negociación da política pesqueira común e a necesidade de que Galicia contribúa na súa elaboración. Ademais, Feijóo e Barroso trataron dun xeito específico os problemas do sector conserveiro tras a baixada de aranceis en países como Papúa- Nueva Guinea. “Trátase dun país que sen dúbida hai que axudar, pero debemos ser moi cautelosos na baixada de aranceis para evitar que outros países como China e Tailandia o poidan aproveitar para acceder á UE”, explicou Feijóo.

Neste sentido, o presidente galego recibiu de Barroso o compromiso de que a UE “estará moi atenta para que non se produzan estas distorsións”. “Plantexou, ademais, a posibilidade de que Papúa- Nueva Guinea poña a disposición dos barcos españois e galegos novos caladoiros. É dicir, que a baixada de aranceis se compense con novos caladoiros neste país”

Invitación para o Xacobeo 2010
O presidente galego comentou, por último, que formulara ao presidente da Comisión Europea unha invitación formal para visitar Compostela e Galicia o vindeiro Xacobeo 2010. “Galicia tense que converter nunha gran capital europea”, remarcou Feijóo, quen avanzou que Durao Barroso aceptou a invitación, “con independencia dos foros de ministros que se poidan celebran en Galicia polo Ano Santo”.