Xosé Manuel Méndez, novo líder do BNG no Baixo-Miño

A GUARDA (MORRAZO-TRIBUNA).- A Asemblea Comarcal do BNG no Baixo-Miño ven de elixir a Xosé Manuel Méndez como Responsábel Comarcal. Substitúe no cargo a Alberte Alonso, que viña desempeñando de xeito continuado este cargo desde hai doce anos, e que continúa formando parte do Consello Comarcal, máximo organo de dirección da organización nacionalista na Comarca do Baixo-Miño. O Consello Comarcal do Baixo-Miño está formado por 14 persoas ás que se sumarán os responsábeis das cinco localidades que conforman a comarca e que se elixiran nos próximos días.
Na súa intervención diante da Asemblea, Méndez afirmou: “estou convencido que con un BNG militante e preocupado polos problemas da sociedade, temos capacidade para achegar a moitos novos compañeiros e compañeiras a este proxecto que van ser fundamentais para paralizar a onda reaccionaria e centralista dun PP que pretende levarnos novamente ao Estado Preautonómico”.

Noutro momento da súa intervención falou da necesidade de apoiar a organización xuvenil Galiza Nova e de potenciar a área da muller dentro da organización.

Rematou a súa intervención poñendo o horizonte do BNG nas próximas eleccións municipais dicindo que o BNG nunca foi conformista e non é o momento de conformarse con manter o poder municipal conquistado na comarca. A chegada do BNG a alcaldía de Tomiño -dixo- é un exemplo claro das políticas que precisa a Comarca e estas políticas compre estendelas aos outros Concellos.