Francisca Canal Gómez tomaba posesión hoxe como deputada na Deputación Provincial de Pontevedra no Pleno que se celebraba ás 11.00 horas. Deste xeito, Francisca Canal pasa a formar parte do Goberno da Deputación en substitución de Corina Porro que dimitiu para formar parte das listas electorais do Partido Popular nas eleccións autonómicas.
VIGO/PONTEVEDRA (MORRAZO-tribuna) .- Francisca Canal é diplomada universitaria en Enfermería e ten un máster en Logopedia. No ano 1986 pasou a ser traballadora da administración autonómica a través de oposición.
Dende entón ten ocupado os cargos de directora da Residencia de maiores de Campolongo en Pontevedra e dunha gardería da Xunta de Galicia. Actualmente, traballa como directora do Centro Sociocomunitario de Redondela, posto ó que tamén accedeu a través de oposición.
No eido político, Francisca Canal é a presidenta do Partido Popular en Redondela dende o congreso local de xuño de 2006 e voceira do grupo municipal. Ademais, no período 2004-2007 formou parte do Goberno da Deputación.
Na súa traxectoria persoal compre sinalar que Francisca Canal naceu en Redondela no ano 1962. Está casada e ten dous fillos.
