Pontevedra-Vigo (MORRAZO-TRIBUNA).-A delegada territorial da Xunta en Vigo, Lucía Molares, recordou hoxe que a delegación territorial que ela encabeza conta coas competencias en materia de Traballo, tal e como establece o decreto que establece a estructura orgánica da Consellería de Traballo e Benestar, aprobado hoxe no Consello da Xunta.
O decreto di literalmente que, para o exercicio das súas competencias, a Consellería de Traballo e Benestar “organízase en catro departamentos territoriais na Coruña, Lugo, Ourense e Vigo, que desenvolverán as súas funcións nas delegacións territoriais nas que se integran, salvo o departamento de Vigo, que desenvolverá tamén as súas funcións no ámbito territorial da delegación de Pontevedra”.
A delegada territorial en Vigo recomenda especialmente a lectura do decreto ao alcalde da cidade, Abel Caballero, quen hoxe asegurou que a delegación viguesa ten agora menos competencias que antes do cambio de goberno e que perdeu as competencias en materia de traballo, algo que é absolutamente falso.
Como xa se ten manifestado en diversas ocasións, coa nova estructura de delegacións territoriais posta en marcha pola Xunta nin Pontevedra nin Vigo perden servicios nin funcionarios, e o que se produce é un importante aforro ao pasar de 52 delegados en toda Galicia a tan só cinco, baixo os criterios de austeridade, eficiencia e eficacia.
En canto ás declaracións do rexedor nas que apuntaba que Lucía Molares non participa na mediación do conflicto do metal porque non ten competencias en traballo, a delegada simplemente quere recordar que leva 24 horas ininterrompidas seguindo as negociacións entre patronal e traballadores.
Nese sentido, Lucía Molares quixo deixar claro que tanto ela como toda a delegación territorial en Vigo e o Goberno galego no seu conxunto seguirán a traballar para dar resposta ás necesidades dos cidadáns, especialmente no ámbito do emprego e dos servizos sociais, sen entrar en conflictos estériles.
