Pontevedra-Vigo (MORRAZO-TRIBUNA).-
O portavoz nacional do BNG, Guillerme Vázquez, compareceu hoxe en rolda de imprensa na Sede Nacional para amosar a solidariedade da formación nacionalista coas novas mobilizacións convocadas polos sindicatos agrarios en defensa do sector lácteo galego. O líder do nacionalismo galego criticou a “parálise” e a “inactividade” quer do Goberno galego quer do Goberno do Estado ante “a situación de emerxencia que vive o sector lácteo galego”.
O portavoz nacional demandou “unha intervención pública decidida” das distintas Administracións e a adopción de “medidas de fondo e outras máis a corto prazo”. “Non pedimos nada distinto ao que xa se ten feito con outros sectores que os gobernos galego e estatal si consideran estratéxicos”, enfatizou.
A intervención pública debe traducirse na fixación dun prezo mínimo para o leite -de maneira que se cubran custos de produción- e na concesión de axudas directas aos produtores, “do mesmo xeito que se ten feito con sectores como o automóbil ou a banca”.
A diminución da cota láctea atribuída aos Estados excedentarios, o incremento da que teñen os deficitarios (entre os que se atopa o Estado español), o control dos mercados e a garantía de recolla do leite por parte das industrias fan parte das “medidas de fondo” cuxa adopción imediata reclama o Bloque Nacionalista Galego.
Tamén exixiu o “cumprimento estrito” das iniciativas apresentadas polo BNG en defensa do sector lácteo e aprobadas polo Congreso dos Deputados (en concreto, unha moción do 21 de Abril pasado e unha proposta de resolución votada durante o debate de política xeral deste último mes de maio).
“Non vale con aprobar as cousas por unanimidade se logo non se ten vontade política para materializalas”, denunciou o líder nacionalista.
