Juárez está por cumplir el "pacto do leite"

Pontevedra-Vigo (MORRAZO-TRIBUNA).- O conselleiro de Medio Rural, Samuel Juárez, respondeu esta tarde no Parlamento de Galicia a sendas interpelacións dos grupos da oposición respecto das actuacións da Xunta de Galicia para poñer freo á crise de prezos no sector lácteo.

Na súa alocución, Juárez afirmou que o departamento que dirixe “vai esixir ás industrias a sinatura de contratos cos produtores en tódalas súas liñas de axuda e intervencións no sector”, como medida para garantir o cumprimento do recente ‘Pacto do Leite’, asinado en Madrid entre representantes das industrias, comercializadores e produtores.

Igualmente, o titular de Medio Rural quixo clarexar que a Xunta seguirá traballando co Ministerio de Medio Ambiente y Medio Rural y Marino “para coordinar os esforzos neste ámbito, evitando que a descoordinación, ou a duplicidade de órganos de coordinación entre as Administracións, os produtores, as industrias, e a distribución, sexan utilizados por aqueles que se moven ben no caos que supón o mercado lácteo. Cremos que arestora é posible terminar con este caos, e imos esgotar os esforzos neste sentido”.

Un mercado lácteo que, lembrou o conselleiro, “levaba nada menos que 16 meses vendo cómo os prezos percibidos polo produtor non deixaban de baixar”.

Samuel Juárez apelou á responsabilidade da Unión Europea na posible solución á crise sectorial, e recordou que a Xunta “defende o incremento dos prezos de intervención, a mellora dos mecanismos de drenaxe en forma de axudas á exportación, e o fomento do consumo interno mediante campañas de promoción”.

Compromiso cumprido
Tamén recordou o conselleiro que a Xunta se comprometera a elaborar un Plan Estratéxico do Sector Lácteo nos primeiros cen días de goberno de Alberto Núñez Feijoo, compromiso que foi cumprido o pasado 21 de xullo. Un Plan que tamén foi presentado no Consello Agrario, e no que agora se está a traballar recibindo “as observacións a este documento por parte dos representantes do sector”.

O Plan contempla, entre outros aspectos salientados polo titular de Medio Rural, a redución dos custos das explotacións fomentando o incremento da base territorial; novos investimentos para a mellora da eficiencia enerxética; o fomento da diversificación da produción láctea para unha menor dependencia do leite UHT; e a promoción e potenciación da imaxe do Leite de Galicia, en cuxo indicativo se está a traballar arestora.


Apoio decidido ao lácteo
Na interpelación, Juárez lembrou algunhas das accións máis importantes de entre as desenvolvidas por Medio Rural desde a súa toma de posesión. Entre elas, o desbloqueo dos pagos das axudas a agricultores mozos, por importe de 24 millóns de euros; o anticipo do ‘pago único’ por importe de 70 millóns; liñas de apoio ao circulante en colaboración co IGAPE; o incremento do investimento en plan de mellora de explotacións agrarias, por valor doutros 10,2 millóns; ou a modificación da orde de axudas a plan de mellora e primeira instalación, para aumento do anticipo.

Finalmente, o conselleiro de Medio Rural referiuse ás preto de 11.000 solicitudes que se teñen presentado ao abeiro da orde de axudas directas para os produtores, axudas de ata un céntimo de euro por quilo de cuota, que suporá para a Xunta un desembolso global de 20 millóns de euros.

Estes cartos supoñen un esforzo orzamentario para as arcas autonómicas moi importante, non só polo marco de actual restrición económica, senón por canto Galicia é a primeira Comunidade en produción de leite e en número de produtores.