29 julio 2009

Gusano voraz asusta a la Xunta que pide freno a las importaciones de madera de pino de Portugal

Pontevedra-Vigo (MORRAZO-TRIBUNA).- O conselleiro do Medio Rural da Xunta de Galicia, Samuel Juárez, elevou esta mañá a petición de intensificar os controis sobre a importación de madeira e derivados de piñeiro desde Portugal, no decurso da Conferencia Sectorial celebrada no Ministerio de Medio Ambiente y Medio Rural y Marino, con presenza de representantes de tódalas Comunidades Autónomas.

A decisión, que corresponde por competencia ao Goberno Central, está xustificada pola masiva presenza do nematodo do piñeiro en territorio portugués, e a posibilidade da súa extensión inmediata máis aló das súas fronteiras.

Con esta petición, a Xunta de Galicia pretende que as administracións públicas españolas asuman a responsabilidade de atallar a transmisión deste verme microscópico, que podería botar por terra a produción de madeira de piñeiro. Engade o conselleiro do Medio Rural que “o Goberno galego quere evitar a transmisión da praga no territorio español e as súas consecuencias económicas no sector forestal”.

Un verme voraz

O nematodo da madeira do piñeiro (Bursaphelenchus xylophilus) é un invertebrado, un verme cilíndrico de menos de 1 milímetro de lonxitude (inapreciable, por tanto, a simple vista) que medra no interior da madeira de piñeiro e, excepcionalmente, doutras coníferas. Para se transmitir dunha árbore a outra precisa do que se denomina un vector, é dicir, un axente transmisor, que neste caso é o escaravello cerambícido (Monochamus galloprovincialis), perforador da madeira, e que sinte forte atracción polos piñeiros feridos, decadentes ou moribundos.

Toda vez que se calcula que Galicia importa cada ano en torno aos 500.000 metros cúbicos de madeira de piñeiro portugués, a Xunta ten intensificado até o de agora os controis nos postos fronteirizos das provincias de Ourense e Pontevedra, e as análises da madeira importada, sen que ata o momento se teña rexistrado ningún caso positivo de nematodo do piñeiro en territorio galego. Porén, Medio Rural prefire previr a remediar, e pretende impedir que se dea sequera o primeiro positivo, polo que acaba de realizar a solicitude de que as forzas e corpos da Seguridade do Estado se involucren dun xeito activo.