Nuevos dirigentes en el Centro Galego de Tecnificación Deportiva

Pontevedra-Vigo (MORRAZO-TRIBUNA).- O secretario xeral para o Deporte, José Ramón Lete Lasa presentou a Elena Fernández Rodríguez e Pilar López Graña como as novas directora e subdirectora do Centro Galego de Tecnificación Deportiva (CGTD). Ao acto celebrado no propio CGTD asistiron a secretaria territorial da Xunta en Pontevedra Ana Ortiz, diversas personalidades do mundo deportivo galego como David Cal ou Javier Gómez Noya, e varios presidentes das federacións deportivas galegas.

A nova directora do CGTD, Elena Fernández Rodríguez é licenciada en Educación Física e actualmente é a xefa de estudos do Instituto de Educación Secundaria Torrente Ballester en Pontevedra. A súa dilatada experiencia tanto no ámbito deportivo como no educativo foron os seus principais avais para asumir a dirección do centro.

Pola súa banda, Pilar López Graña, a nova subdirectora é doutora en Educación Física e exerceu como profesora de Educación Física no Instituto de Educación Secundaria de Poio e conta cunha longa traxectoria deportiva tanto como de xogadora como de adestradora. Na tempada 2005-2006 foi a adestradora da Sociedade Deportiva Teucro.

Deporte desde a base
O CGTD é un dos centros de tecnificación pioneiros en España, na liña das residencias Blume de Madrid ou Barcelona. Actualmente, o CGTD, oferta un total de 170 prazas das que 90 contan con servizo de aloxamento e imparte un total de 9 modalidades deportivas: atletismo, loita, judo, natación, piragüismo, remo, taekwondo, tenis e tríatlon.

Unha das principais vantaxes do CGTD é que permite a compatibilización dos estudos co adestramento. A día de hoxe oferta desde 3º da E.S.O. ata 2º de Bacharelato, pero estase traballando na súa ampliación, de xeito que os deportistas poidan estudar ciclos de formación profesional da rama da Actividade Física.

Precisamente, un dos proxectos da nova directiva é o achegamento do CGTD ao ámbito universitario para que a través de convenios os datos xerados polos deportistas no centro pontevedrés poidan ser aproveitados cientificamente e ao mesmo tempo os deportistas poidan valerse dos coñecementos que lles aporte a universidade.

Para unha mellor adecuación dos servizos, dentro propio CGTD existen tres clases de grupos. Os primeiros, os de tecnificación, contan con 100 prazas e están destinados a xoves promesas menores de 19 anos. En segundo lugar, o centro está introducindo grupos de rendemento, para deportistas de 19 anos en adiante, que polo momento contan con 40 prazas e coa aposta decidida do centro por consolidalos. Finalmente, existen 30 prazas máis para os deportistas de elite galegos que necesiten dos servizos do CGTD. Entre eles, atópanse xa confirmados os nomes do medallista olímpico David Cal, a tamén piragüista e campiona mundial Teresa Portela ou o triple gañador da Copa do Mundo de tríatlon Javier Gómez Noya.

Nas vindeiras semanas as diferentes comisións pecharán o listado dos deportistas que estarán no CGTD para o vindeiro curso 2009/10.