VIGO/PONTEVEDRA (MORRAZO-tribuna) .- O PP presentaba nas últimas horas unha moción para restablecer o control do tratamento do Sintrom en Redondela. A voceira do Partido Popular de Redondela, Francisca Canal, presentou no pleno ordinario municipal do pasado 29 de Outubro unha moción sobre a falla de servizo do tratamento do Sintrom no centro de saúde de Redondela. Son 340 os enfermos afectados por este problema que se debe á escaseza de persoal no citado centro.Canal informou mediante dita moción de que, segundo se plasmou nos medios de comunicación, "o propio Sergas admite desaxustes no mencionado servizo na localidade de Redondela" e lembrou que "os mesmos medios publicaron tamén que os pacientes que precisen deste tratamento deben desprazarse agora ata o Hospital Xeral-Cíes, en Vigo". Deste xeito o Partido Popular quíxose facer eco das demandas dos afectados, na súa maioría persoas maiores que poden ver dificultado o seu acceso ó tratamento, solicitando no pleno do pasado mércores "que se lle insista ó Sergas para que consolide dito servizo no noso municipio, dotandoo de persoal se fose preciso e dos mecanismos axeitados para dar servizo ós usuarios demandantes do mesmo". Esta moción, aínda que lle foi presentada ó pleno da Corporación Municipal, non puido ser debatida xa que os concelleiros do PP abandoaron a sesión plenaria "a causa das insolencias que Carlos Pazos e Emilio González Iglesias lle profesaron á voceira popular, Francisca Canal", xustificaron desde o PP; sen embargo Canal informou hoxe de que no vindeiro pleno a moción será levada de novo a debate.
