De interés social : inscripciones en "Principe Felipe"

MAÑÁ ÁBRESE O PRAZO PARA PRESENTAR AS SOLICITUDES DE INSCRICIÓN NO CENTRO DE DÍA DE PRÍNCIPE FELIPE

VIGO/PONTEVEDRA (MORRAZO-tribuna) .- A Deputación de Pontevedra fixo hoxe pública, no Boletín Oficial da Provincia, a apertura do prazo para presentar as solicitudes de inscrición no Centro de Día da Cidade Infantil Príncipe Felipe para o curso 2009-2010. As solicitudes, que deberán ser presentadas na xerencia do propio centro, poderán realizarse ata o día 14 de abril.
Os destinatarios das prazas, menores de entre 4 meses e 16 anos procedentes de familias que necesitan dun apoio diario e puntual para completar a formación e atención dos seus fillos, terán dereito a un total de 120 prazas, repartidas do seguinte xeito: 10 para nenos de entre 4 e 18 meses, 20 para nenos de 18 meses a 3 anos, 40 para rapaces de entre 3 e 8 anos, e 50 para mozos de entre 8 e 16 anos.
O Centro de Día, en función das prestacións que ofreza ós beneficiarios, rexérase polas modalidades de atención de día básica e integral.
A Atención de día básica ofrece aloxamento diúrno; atención durante o curso lectivo, axustándose o máximo ó calendario escolar, con excepcións da fin de semana e festivos, e do 1 de Xullo ó 31 de Agosto.
Con horarios de atención flexible, dependendo das necesidades do menor; xantar e merenda; apoio e seguimento escolar, incluíndo materiais funxibles nos casos oportunos; financiamento do transporte de proximidade de ida e volta ó domicilio familiar, salvo os nenos de idades comprendidas entre os 4 meses e os 3 anos
A modalidade de Atención de día integral recolle todos os anteriores servizos e, ademais, presta un horario de atención de 8:00 horas da mañá a 20:00 da tarde, dando atención todo o ano, excepto no mes de xullo. Ofrece, ademais de xantar e merenda, en casos puntuais, almorzo e cea.
Actividades
O Centro disporá dun servizo básico de manutención para os menores, con cobertura alimenticia e hixiénica; ademais, proporcionaranse os recursos cos que conta esta Institución de carácter psico-educativo necesarios. Os esforzos do centro centraranse nos seguintes apartados:
Actividades de apoio e seguimento escolar; intervención médico-sanitaria en caso de urxencia; hixiene e educación nos hábitos de saúde; celebración de cumpreanos e festas; servizo de información, orientación e apoio psicoeducativo; orientación familiar; animación planificada do tempo libre; biblioteca (promoción da lectura), realización de diversas actividades a través de distintos talleres de educación para a saúde, de deporte, de música, de habilidades sociais, de apoio escolar e hábitos de estudo ou de orientación laboral.
Admisión
Para que os nenos sexan admitidos, os titores deberán presentar a solicitude debidamente cumprimentada.
En función da situación económica familiar, o centro valorará ás familias que ingresen o dobre do SMI ou superior, 0 puntos; entre ó SMI e o dobre, 1 punto; SMI ou inferior, ata o 75%, 2 puntos; inferior ó 75% do SMI, 3 puntos; 50% do SMI ou inferior, 4 puntos;
No tocante á situación laboral familiar, terase en conta a ocupación de ámbolos dous membros parentais, 3 puntos; situación laboral de desemprego dos dous membros parentais, inferior ós 6 meses, 2 puntos; Situación laboral de desemprego de un dos membros parenteis, inferior ós 6 meses, 1 punto;
En canto á situación socio-familiar, por cada membro menor de 18 anos a cargo da unidade familiar, incluído o neno para o que se solicita a praza, de 1 punto ata un máximo de 3; por discapacidade física, psíquica ou sensorial superior o 50%, doenza crónica que requira internamento, alcoholismo ou drogodependencia: pai, ata 3 puntos; nai, ata 3 puntos; fillos, ata 2 puntos. Pola condición de familia monoparental, 2 puntos.
Calquera outra circunstancia socio-familiar susceptible de valoración ó xuízo da comisión e adecuadamente acreditada, de -4 ata 4 puntos; informe dos servizos de psicoloxía, valorando as circunstancias do menor de -4 ata 4 puntos, informe dos Servizos Sociais, valorando as circunstancias do menor, familia, entorno, concialiación laboral-familiar de -4 ata 4 puntos