Empresarios gallegos en Argentina trasladan problemática a la Xunta

Buenos Aires (MORRAZO-TRIBUNA).- O Delegado da Xunta de Galicia en Buenos Aires, Alejandro López Dobarro, vén de recibir ao presidente da Asociación de Empresarios Galegos de Arxentina (AEGA), Osvaldo Méndez, con quen tivo ocasión de achegarse a unha das entidades máis novas da colectividade galega no país austral.

Méndez informou ao Delegado da Xunta a situación actual da institución e trasladou a invitación para participar na Asemblea Constitutiva de AEGA, que se desenvolverá o vindeiro 10 de setembro, logo de obter a personeiría xurídica por parte da Administración arxentina.

Este encontro, dixo Méndez, servirá para dar o “pulo definitivo á asociación” e “consolidar a súa presentación en sociedade”. Segundo informou o representante dos empresarios galegos en Arxentina, AEGA conta na actualidade con preto de 60 asociados nos eidos da restauración, metalurxia, téxtil, químicos, metalmecánico, servizos e agro. Entre os seus principais obxectivos figuran o incremento de membros en todo o territorio arxentino, e, segundo dixo Méndez, están a traballar xa na constitución de delegacións da entidade en Rosario, Mar del Plata, Bahía Blanca e Comodoro Rivadavia.

Así mesmo, o presidente de AEGA destacou que na súa institución, na que poden participar empresarios galegos ou os seus descendentes ata terceira xeración, están a medrar as incorporacións de empresarios mozos e de mulleres.

No encontro tamén participaron o tesoureiro da entidade, Daniel Fraga, un membro da comisión fiscalizadora, José Luis Otero, e maila empresaria Clara Obenza.