Pontevedra-Vigo (MORRAZO-TRIBUNA) .- Varios habitantes do Condado acordaron a creación dunha sociedade gastronómica, na cal se realizarán diversas comidas e ceas con produtos do país e da tempada, ademais de aproveitar o momento para confraternizar.
A Sociedade Gastronómica “Cachelos”, que no momento da súa fundación conta xa con máis de vinte asociados, está aberta a todos os veciños e veciñas que compartan o interese por un ocio saudable baseado nunha boa mesa e na boa compaña.
Germán Álvarez, presidente da Sociedade, comenta que para formar parte de Cachelos só hai que cumprir dous requisitos, “ser veciño/a do Condado ou ter unha propiedade no noso territorio, e disfrutar do bo xantar”.
Na primeira reunión “aproveitouse a ocasión para acordar o funcionamento e determinar unha directiva que prepare unha Asamblea - xantar nun local senlleiro da Comarca, degustando comida caseira e disfrutando de boa compañía e música”.
O nome desta Sociedade Gastronómica, “Cachelos” é unha homenaxe a un produto que paliou a fame nos tempos duros que viviron os galegos: “a pataca”. A infinidade de pratos que inclúen os cachelos como parte básica da elaboración e/ou acompañamento, da unha mostra clara da importancia que tivo e ten o prezado tubérculo na nosa dieta.
Álvarez anima a todos os veciños do Condado a participar na S.G. Cachelos, poñéndose en contacto no blogue; http://sociedadegastronomicacachelos.blogspot.com/ ou no correo sg.cachelos@gmail.com