Pontevedra-Vigo (MORRAZO-TRIBUNA) .- Galicia rexistrou o pasado mes de setembro un total de 365.517 viaxeiros aloxados en establecementos hoteleiros. Segundo datos da Enquisa de Ocupación Hoteleira do INE, esta cifra supón un incremento do 3,8% a respecto do mesmo mes de 2008. Pola contra, no conxunto de España, a cifra de viaxeiros descendeu un 6,2% en termos interanuais.
O bo comportamento do volume de viaxeiros en Galicia contrasta tamén co observado para o conxunto das Comunidades Autónomas. En particular, só tres delas obteñen valores positivos nas taxas interanuais. Galicia rexistra o segundo mellor incremento interanual no mes de setembro, só por detrás de Estremadura, que obtivo un incremento positivo do 6,3%.Nos nove primeiros meses do ano Galicia acumula un total de 2.695.411 viaxeiros, case un 5% menos que no mesmo período de 2008. Esta caída é menor que a da media estatal, que se sitúa no 8%. O 77% dos viaxeiros aloxados en establecementos hoteleiros son de procedencia nacional, mercado que experimentou un crecemento tamén notable no mes de setembro (concretamente do 5,1%). O mercado estranxeiro, pola contra, diminuíu nun 0,32%, cifra que tamén vén a ser a mellor das observadas para os meses anteriores.
En termos de pernoitas, Galicia rexistrou un total de 796.478 no mes de setembro, un 2,4% máis que no mesmo mes do pasado ano. Pola contra, a nivel nacional, a cifra de pernoitas en establecementos hoteleiros caeu un 6,3% de media. A nivel de Comunidades Autónomas, Galicia rexistrou tamén neste caso a segunda mellor taxa de incremento de toda España, só superada por Estremadura.
