-
Pontevedra-Vigo (MORRAZO-TRIBUNA) .- O Partido Popular de Redondela pedirá explicacións sobre os motivos que levaron a tomar a decisión de abandonar o proxecto de construción do novo auditorio da marisma, anunciada polo alcalde no último pleno municipal.
“Levamos anos escoitando dicir a Xaime Rey que o auditorio non era un proxecto senón unha realidade, e agora informa que toda a inversión realizada ata o momento non serviu de nada”, explica o concelleiro popular Alberto Pazos.
Estamos ante un novo incumprimento do bipartito de Redondela. Neste caso o informalidade é aínda máis grave se cabe, “despois de incluir fotografías virtuais no programa socialista ou pasear á ex conselleira María Xosé Caride pola vila para vendernos un proxecto que xa fora licitado e que finalmente quedarase nunha nova mentira do alcalde aos redondeláns”, sinala Pazos.
É evidente que despois de todo isto o alcalde de Redondela débelle unha explicación convincente aos vecinos do municipio e “nós esixirémola no vindeiro pleno, o mércores 28 de outubro”. Dende o Partido Popular “queremos coñecer polo míudo de quen é a responsabilidade deste novo engano”, que se suma aos do PXOM, o paseo marítimo, o mercado de gando, o paseo polo viaducto, o acceso a San Simón ou o compromiso de apoiar a alternativa máis curta da conexión coa A-57, entre outras moitas. “Este é un digno colofón á carreira de Xaime Rey, a última das súas grandes mentiras: prometeu un auditorio e deixounos un debuxo”, conclúe o edil popular.
