VIGO/CANGAS .- O barco de Greenpeace «Rainbow Warrior» e barcos pesqueiros da ría de Vigo realizaron onte á tarde unha concentración na punta de Balea-O Salgueirón, en Cangas manifestándose contra o inicio das obras do porto deportivo da zona de Massó, tal e como informou hoxe un portavoz do colectivo «Galicia non se vende», Xosé Reigosa, quen explicou que o buque insignia de Greenpace, o «Rainbow Warrior» uníuse sobre as 18.00 horas, á concentración cívica convocada polo ente que representa.
Reigosa recordou que o pasado luns se iniciaron as obras dese porto deportivo baixo un forte dispositivo de protección por parte da Garda Civil. «é unha protección inexplicable porque se trata dunha construción ilegal e dun porto ilegal», dixo Reigosa, á vez que afirmou que o proxecto se redactou no seu día en ausencia do preceptivo Plan de Usos do Porto e da Ría de Vigo. "A continuación das obras tamén reavivou as diferenzas entre os socios do goberno muncipal da localidade do Morrazo. O concelleiro de Urbanismo, o independente Mariano Abalo, solicitou a paralización das obras mentres que a alcaldesa do BNG, Clara Millan, negouse a dar a orde", lembraron esta noite pasada membros do colectivo "Paremos a Desfeita".
O portavoz de «Galicia non se vende» aproveitou a comparecencia diante dos xornalistas para anunciar que o vindeiro domingo 31 de maio celebrarase en Vigo unha manifestación para denunciar os «continuos malos tratos e agresións que soporta o noso litoral», froito, dixo, da «especulación salvaxe» do actual modelo de crecemento económico. A manifestación partirá ás 12.00 horas da Praza do Rei e discorrerá ata a Praza dá Estrela.
