Moción en Silleda : el Bloque condena abiertamente el proceso

Pontevedra-Vigo (MORRAZO-TRIBUNA).- El Bloque, a través do secretario de Acción Municipal da Executiva Nacional, Manuel Antelo, quer valorar a moción de censura apresentada hoxe polo PP, co respaldo de dous ex concelleiros do PsdeG-PSOE, contra a alcaldesa de Silleda.

O BNG condena con enerxía esta moción por constituír unha “manobra antidemocrática”, afirma Manuel Antelo. “O PP recorre a estes atallos para chegar ao poder e violar a vontade popular expresada nas urnas. Isto demostra até que punto o PP non acepta de bon grao os resultados electorais”.

Para o dirixente nacionalista, a moción pon de manifesto a “perda de credibilidade” dos presidentes do PP galego e estatal -Alberto Núñez Feijóo e Mariano Rajoy, respectivamente. “Acaba de verse que a súa palabra non ten nengún valor. Acaban de ser desautorizados polos seus propios concelleiros”, afirma Antelo, quen a seguir pide quer a Feijóo quer a Rajoy “que tomen medidas políticas contundentes para evitar que os seus grupos municipais atenten contra a democracia nos concellos galegos”.

Lembrou neste sentido que o BNG xa ten sufrido estas manobras antidemocráticas: “Todos temos na mente o caso de Gondomar. Alí violouse a vontade popular e fíxose para pór a institución non ao servizo do pobo, senón de intereses moi escuros e de tramas urbanísticas”.

O secretario de Acción Municipal apunta o presidente da Deputación de Pontevedra como indutor destas “manobras escuras”: “Pero está claro que el non actúa pola súa conta. Actúa en función dunha estratexia perfectamente orquestrada polo seu partido”, conclúe.