Deputación asesora aos comerciantes

CANGAS (MORRAZO-TRIBUNA).- A Deputación de Pontevedra, a través da súa Área de Comercio está a desenvolver un
programa de asesoramento comercial personalizado en Visual Merchandising
destinado aos pequenos comerciantes da provincia.
O Plan “Á túa medida” quere axudar aos comerciantes a presentar os produtos
no seu comercio de xeito que teñan a maior oportunidade de ser vendidos e para iso
ofrécelles un asesoramento gratuíto e personalizado no seu propio comercio.
O Plan “Á túa medida” está enmarcado dentro da liña de acción “Formación e
cualificación do sector comercial” recollida no Plan Director de Comercio 2009 – 2012
que o que busca é ofrecer formación aos responsables dos comercios dun xeito
diferente, ameno e personalizado.
A primeira visita aos comercios na que un experto en visual merchandising prestará o
asesoramento “in situ” e de forma individualizada para cada comercio seleccionado
está tendo lugar esta semana. A Óptica Prisma e Pipa Moda Infantil, en Cangas
recibiron a visita esta mañá. Durante a mesma contaron coa axuda de especialistas
con ampla experiencia que lles axudaron a poñer en marcha un plan comercial de
mellora adaptado ás necesidades concretas do seu comercio.