Ana Pontón lembra que o pasado 4 de Agosto a Consellaría de Cultura e Turismo informou a través dunha nota de prensa da visita do conselleiro a Estocolmo para manter “un encontro amigábel” coa presidenta da Fundación Carlos Casares e para tratar algún dos proxectos da fundación en Suecia.
“Resúltanos inexplicábel esta viaxe estival”
A parlamentaria nacionalista considera “inexplicábel esta viaxe estival, máxime cando a información que fai pública a Xunta de Galiza non fala dunha visita institucional senón dun encontro amigábel”.
Ademais, lembra que “non se aclaran os motivos que levan ao conselleiro a manter un encontro coa presidenta dunha fundación en Estocolmo, cando esta ten a súa sede na Galiza, concretamente na cidade de Vigo”.
Por todo isto, a deputada do BNG pregúntalle ao conselleiro de Cultura que explique cal foi a urxencia que motivou esta viaxe, se foi unha xuntanza oficial ou tivo un carácter “amigábel” e que informe dos acordos e compromisos que se derivaron deste encontro.